စစ်တွေ ရှိစစ်ကောင်စီစခန်းများကို AA ထိုးစစ်ဆင်တိုက်ခိုက်

ရခိုင်ပြည်နယ်၊ မြို့တော် စစ်တွေ ရှိ စစ်ကောင်စီ၏ အမြင့်ကျွန်းတွင်ရှိသည့် တပ်စခန်းကို Arakan Army က ထိုးစစ် ဆင် တိုက်ခိုက်နေကြောင်း သိရသည်။

စစ်တွေရှိ အမြင့်ကျွန်း၊ ကျားမသောက်၊ ပါဒလိတ်နှင့် ရေချမ်းပြင်တို့ရှိ စစ်ကောင်စီစခန်းများကို ပြီးခဲ့သည့် ဖေဖော်ဝါရီ ၁၁ ရက်နေ့ ည ၉ နာရီမှ ယမန်နေ့ ဖေဖော်ဝါရီ ၁၂ ရက်နေ့အထိ AA က လက်နက် ကြီး၊ လက်နက်ငယ်များဖြင့် ပစ်ခတ်ခဲ့ကြောင်း သိရသည်။

စစ်ကောင်စီကလည်း ပေါက်တော၊ ပုဏ္ဏားကျွန်းနှင့် ရသေ့တောင်ဘက်များသို့ လက်နက်ကြီးများအပြင် ဒရုန်းဗုံးများပါ ကြဲချတိုက်ခိုက်ခဲ့ကြောင်း သိရသည်။

” လက်နက်ကြီးတွေနဲ့ AA ကအပြင်းအထန် တိုက်ခိုက်နေတာ။ မြို့ထဲမှာလည်း စစ်ရှောင်လိုသူတွေများ ပေမယ့် စစ်တပ်က လမ်းတွေအကုန်ပိတ်ထားတယ်။ လက်နက်သံတွေ ဒီတိုင်းပဲ နားထောင်နေ ရပါတယ်”ဟု စစ်တွေဒေသခံတစ်ဦးက ဧရာဝတီတိုင်းမ်ကို ပြောသည်။

ပြီးခဲ့သည့် ဖေဖော်ဝါရီ ၇ ရက်နေ့မှ ၉ ရက်နေ့အထိ စစ်တွေရှိ စစ်ကောင်စီ၏ ရွှေမင်းဂံရေတပ်၊ ပွိုင့်ကမ်း ခြေအနီး ရေတပ်၊ အမှတ် ၁၂ ရဲတပ်ရင်းစသည့်နေရာ များကို AA က လက်နက်ကြီးများဖြင့် တပြိုင်နက်ထိုးစစ်ဆင်တိုက်ခိုက်ခဲ့ကြောင်း သိရသည်။

ထိုသို့တိုက်ခိုက်ခံရပြီးနောက် စစ်ကောင်စီက စစ်တွေ မြို့အတွင်း လုံခြုံရေးအပြည့်ယူထားသည့်အပြင် တိုက်ခိုက်ရေး သင်္ဘောလေးစီးဖြင့်ပါ အင်အားဖြည့် တင်းထားကြောင်း သိရသည်။

စစ်ကောင်စီက ရန်ကုန်ရှိ ရေတပ်သင်္ဘောနှစ်စီးနှင့် ကျောက်ဖြူမြို့ ဓညဝတီရေတပ်စခန်းမှ သင်္ဘောနှစ် စီး စုစုပေါင်း တိုက်ခိုက်ရေးသင်္ဘောလေးစီးအပြင် ရေယာဉ်ငယ် ဒါဇင်ကျော်ဖြင့် စစ်ရေးလှုပ်ရှားမှုများ ပြုလုပ်လျက်ရှိကြောင်း သိရသည်။

စစ်ကောင်စီ၏ နှင်ထုတ်မှုကြောင့် စစ်တွေမြို့အနီးက ဗျိုင်းဖြူကျေးရွာအပါအဝင် ကျေးရွာပေါင်း ၂၀ ကျော်က ဒေသခံပြည်သူ တစ်သောင်းခန့်မှာ စစ်တွေမြို့အတွင်း ဘုန်းတော်ကြီးကျောင်း ၅၃ ခုတွင် ခိုလှုံနေထိုင်နေကြရသည်။

၂၀၂၄ ခုနှစ် မတ်လကတည်းကစ၍ နေထိုင်ကြခြင်းဖြစ်ပြီး ကမ္ဘာ့စားနပ်ရိက္ခာအဖွဲ့ WFP က ထောက်ပံ့မှု မရသည်မှာ နှစ်လခန့် ကြာမြင့်လာပြီဟု စစ်ဘေးရှောင် ၁၂၀ ကျော်ရှိသော ဘုန်းတော်ကြီးကျောင်းမှာ ကျောင်းထိုင်ဆရာတစ်ပါးက ပြောသည်။

“ဦးဇင်းတို့ကျောင်းမှာ စစ်ရှောင် ၁၂၀ ကျော်ရှိပါတယ်။ စစ်တွေမြို့ အနယ်နယ်အရပ်ရပ်ကပေါ့။ ဗျိုင်းဖြူရွာသားတွေလည်း ပါပါတယ်။ WFP က ထောက်ပံ့မှုမရတာ နှစ်လ ရှိပါပြီ။ တစ်ရက်မှာ ဆန်က တစ်အိတ်ခွဲလောက် ၆ တောင်းလောက် ကုန်ပါတယ်။ ဘုန်းကြီးတို့ သုံးလေးပါး ပေါင်းပြီး ကျွေးထားပါတယ်။ ရေရှည်မှာ ထမင်းငတ်နိုင်ပါတယ်။ အခုတော့ နည်းနည်း တောင့်ခံထားကြတယ်။ ဘာအကူအညီမှ မရရင် မလွယ်ဘူး” ဟု ပြောသည်။

Source: Ayeyarwaddy Times